تعاتبني بعتب خزرات العيون: بقلم الشاعرمحمدكريم راضي البديري. // العراق //
تعاتبني بعتب خزرات العيون:
عجب شعرك صفه وظل للسياسه!
رديّت بترافه وشوگ ولهـان:
انتي-انتي الحُكُمْ ونتي الرئاسـه
ياقانون أوّل خطّه الإنســان
وعلى گدّه لمقاسچ انتي قاسه
يل طولچ مسلّه وبيه حضارات
وعلى خصرچ الياس يطوف ياسه
ودروب المحبّه تخضّر ازهار
إذا جدمچ درب فديوم داسه
آدم بيچ دايخ… آآآه يحــّواء
من ســـبّة غرامچ ضيم جاسه
وانه ابن الفرات وشعري بنيان
من حسـچة هلي دگيّت ساسـه
بس عدنه وطن مجروح محتاج
نوگفله بجداره… يريد ناســـه
ونه شاعر وحرفي يصير شاجور
افرغه براس خاين مات باسه
احبّچ واليحب للموت وفّـــاي
اجيتچ معتنيچ بچفّي طاسه
أترسها بحلاتچ وشرب بشوگ
عطشان اعله شوگچ شاب راسه
الشاعرمحمدكريم راضي البديري.
تعليقات
إرسال تعليق